హైదరాబాద్‌లో సోమవారం సాయంత్రం నుంచి భారీ వర్షం మొదలైంది. ఉరుములు, మెరుపులు, ఈదురు గాలులతో కూడిన వర్షం కురుస్తోంది. ఈదురు గాలుల కారణంగా పలుచోట్ల చెట్ల కొమ్మలు విరిగిపడ్డాయి. గచ్చిబౌలి, మాదాపూర్, రాయదుర్గం, ఖైరతాబాద్, పంజాగుట్ట, లఖ్డీకాపూల్, అమీర్‌పేట్, రాజేంద్రనగర్, అత్తాపూర్, శ్రీనగర్, ఎర్రగడ్డ, యూసుఫ్‌గూడ, లంగర్హౌస్, గండిపేట, శివరాంపల్లిలో భారీ వర్షం కురిసింది. పంజాగుట్ట, జూబ్లీహిల్స్, బంజారాహిల్స్, అమీర్‌పేట్, బేగంపేట, సికింద్రాబాద్, గచ్చిబౌలి, మణికొండ, షేక్‌పేట్, కొండాపూర్, హైటెక్ సిటీ తదితర ప్రాంతాల్లో కూడా భారీ వర్షం కురిసింది. 

వర్షాలు కురిస్తే రోడ్లన్నీ జలమయమై వాహనదారులు ఇబ్బందులు పడుతున్నారు. చాలా చోట్ల ట్రాఫిక్ జామ్‌లు ఏర్పడ్డాయి. వరదనీటిని తొలగించేందుకు డీఆర్‌ఎఫ్ అధికారులు అన్ని ప్రయత్నాలు చేస్తున్నారని జీహెచ్‌ఎంసీ తెలిపింది. మీకు ఏవైనా సమస్యలు ఉంటే, దయచేసి 040-21111111, 9000113667కు కాల్ చేయండి.